ვებ-გვერდი მუშაობს განახლების რეჟიმში
 

 



საქართველოს საგარეო საქმეთა სამინისტრო

 

06.12.2017 ქ. ბრიუსელი - 

„საქართველოსთან პარტნიორობა ნატო-სთვის ძალზედ მნიშვნელოვანია“-ამის შესახებ განაცხადა ნატოს გენერალურმა მდივანმა იენს სტოლტენბერგმა საქართველოს ვიცე-პრემიერთან, საგარეო საქმეთა მინისტრთან, მიხეილ ჯანელიძესთან გამართული შეხვედრის შემდგომ.  გენერალურმა მდივანმა კიდევ ერთხელ გამოხატა მისი და ალიანსის მტკიცე მხარდაჭერა საქართველოს მიმართ და ხაზი გაუსვა საქართველოსთან პარტნიორობის მნიშვნელობას. „მე გამოვხატე ჩემი და ნატო- საქართველოს პარტნიორობის მიმართ ჩემი და ალიანსის მტკიცე მხარდაჭერა. საქართველოსთან პარტნიორობა ნატო-სთვის  და საქართველოსთვის ძალზედ მნიშვნელოვანია, ჩვენ ვახორციელებთ საქართველოს პოლიტიკურ და პრაქტიკულ მხარადჭერას, მხარს ვუჭერთ საქართველოს სუვერენიტეტს და ტერიტორიულ მთლიანობას და ასევე მივესალმებით რეფორმებს, რომელზეც საქართველოა ფოკუსირებული.  საქართველო დიდ ყურადღებას უთმობს კანონის უზენაესობას და დემოკრატიული ინსტიტუტების აღმშენებლობას.  ჩვენ მივესალმებით აღნიშნულ რეფორმებს და გავაგრძელებთ საქართველოს მხარდაჭერას. ასევე მსურს აღვნიშნო. რომ საქართველო ნატო-ს მტკიცე მხარდამჭერია. ჩვენ ვხედავთ, რომ საქართველო მონაწილეობს ნატო-ს სხვადასხვა მისიებსა და ოპერაციებში და ჩართულია ნატო-ს სწრაფი რეაგირების ძალებში. ასევე აღსანიშნავია, რომ საქართველო 900-მდე სამხედროთი, ერთერთი ყველაზე მსხვილი კონტრიბუტორია ავღანეთში. ჩვენ გავაგრძელებთ ერთად მუშაობას და მოუთმენლად ველი   ნატო-საქართველოს კომისიის შეხვედრას ალიანსის წევრი ქვეყნების საგარეო საქმეთა მინისტრებთან ერთად.“- განაცხადა ნატო-ს გენერალურმა მდივანმა.

განთავსების თარიღი: 06.12.2017
 

ა.წ. 5 დეკემბერს, 13:00 საათზე საქართველოს საელჩოს წილად ხვდა ბედნიერება, შეესრულებინა მნიშვნელობით ერთი მეტად აღსანიშნავი  და ალბათ ერთ-ერთი ყველაზე სასიამოვნო მისია - ღირსეული, ღვაწლმოსილი ადამიანისთვის საქართველოს პრეზიდენტის მიერ მინიჭებული „ღირსების ორდენის“  გადაცემის ექსკლუზიური მისია. განსაკუთრებით სასიამოვნოა ეს ფაქტი ისრაელში საქართველოს სრულუფლებიანი ელჩისთვის, ბატონი პაატა კალანდაძისთვის, ვინაიდან სწორედ მან წარუდგინა საქართველოს პრეზიდენტის პრემიების მიმნიჭებელ კომისიას, საქართველო-ისრაელის ურთიერთობებისა და თანმშრომლობის  გაღრმავებისა და გაძლიერების საქმეში შეტანილი წვლილისთვის  ღირსების ორდენზე, პედაგოგისა და ჭეშმარიტი საზოგადო მოღვაწის, ქალბატონი ლია კრიხელის კანდიდატურა. ქართველ ებრაელთა თემისთვის და ქალბატონი ლიას მოღვაწეობის სფეროს წარმომადგენელთა, ასევე, ისრაელის, განსაკუთრებით კი ქალაქი ბათ-იამის საგანმანათლებლო წრეებში  ქალბატონ ლიას დიდი ხანია საზოგადო მოღვაწეს უწოდებენ და დამსახურებულად ამაყობენ მისი მიღწევები საქართველოში, ივრითის შემსწავლელი პირველი „ულპანის“ დამაარსებელი ლიანა კრიხელი, თავისი საქმითა და ცოდნით სახელმოხვეჭილ საქართველოს ქალთა საბჭოს ისრაელის წარმომადგენელია. აღსანიშნავია, რომ თვალსაჩინო საქველმოქმედო საქმიანობისათვის ქალთა საბჭომ იგი 2015 წელს პრემიით „ამაგდარი“, ხოლო 2016 წელს - პრემიით „ქომაგი“ დააჯილდოვა. ისრაელში განსაკუთრებული პოპულარობით სარგებლობს მისი, როგორც აღნიშნავენ, უნიკალური პროექტი „გაიცანით თქვენი შვილები“, რომელიც ემსახურება ისრაელში დაბადებულ და გაზრდილ ქართველ ებრაელთა ახალი თაობის მიღწევების წარმოჩენას და პოპულარიზაციას. არანაკლები პოპულარობით სარგებლობს ლია კრიხელის მიერ ქ. ბათ-იამში დაარსებული თანამოაზრე ქალთა გაერთიანება „ბათ-ამი“ და ბათ-იამის მერიასთან არსებული  ივრითის შემსწავლელი კურსები „50+“.

 

საელჩოში ჩატარებულმა დაჯილდოების ცერემონიალმა, რომელსაც 30-მდე სტუმარი დაესწრო, კიდევ ერთხელ ცხადყო ქართველებსა და ებრაელებს შორის არსებული 26 საუკუნოვანი, შეურყეველი მეგობრობა.

 საქართველოს საელჩო ულოცავს ქალბატონ ლია კრიხელს დამსახურებულ ჯილდოს და მას შემდგომ წარმატებებს უსურვებს!

 

 

 

განთავსების თარიღი: 06.12.2017
 

ა.წ. 4 დეკემბერს საქართველოს ელჩმა, ბ-ნმა პაატა კალანდაძემ ისრაელურ ჟურნალ "ნოფშიმ’’-ის ჟურნალისტს, ბ-ნ იაკოვ მაორს უმასპინძლა. ჟურნალი განკუთვნილია ისრაელში მცხოვრები მორწმუნე ებრაელებისთვის, თვეში 60 000-იანი ტირაჟით და ვრცელდება ისრაელის სახელმწიფოში არსებულ ყველა სინაგოგაში.

ინტერვიუში ბ-ნმა ელჩმა  საქართველოს მრავალმხრივი ტურისტული პოტენციალის შესახებ ისაუბრა და ჟურნალისტს გააცნო ის მიმართულებები, რომლებიც ხელს შეუწყობს ისრაელის მორწმუნე და ტრადიციული ებრაელი ტურისტების მოზიდვას საქართველოში.

აღნიშნული ინტერვიუ ჟურნალის უახლოეს ნომერში დაიბეჭდება და ვიმედოვნებთ, რომ ის კიდევ უფრო გააღვივებს  მორწმუნე იუდეველებში საქართველოში გამგზავრების სურვილს.

განთავსების თარიღი: 04.12.2017
 

29.11.2017 ქ. აშხაბადი -საქართველოს ვიცე-პრემიერმა მიხეილ ჯანელიძემ მონაწილეობა მიიღო ქ.აშხაბადში მიმდინარე ენერგეტიკული ქარტიის კონფერენციაში, სადაც სიტყვით მიმართა ღონისძიების მონაწილეებს.  საკუთარ გამოსვლაში საქართველოს საგარეო საქმეთა მინისტრმა ხაზი გაუსვა საქართველოს როგორც ენერგეტიკული რესურსების სატრანზიტო ქვეყნის აქტიური მონაწილეობის მნიშვნელობას საერთაშორისო ენერგეტიკულ ქარტიაში. მან ვრცლად მიმოიხილა საქართველოს მონაწილეობით მიმდინარე და დაგეგმილი საერთაშორისო ენერგეტიკული პროექტები, რომელიც ხელს უწყობს აღმოსავლეთ-დასავლეთის მიმართულების განვითარებას და მათ შორის კარგ შესაძლებლობებს ქმნის თურქმენული გაზის ტრანსპორტირებისთვის ევროპაში. მისი განცხადებით საქართველო წარმოადგენს მნიშვნელოვან პარტნიორს ცენტრალური აზიის რეგიონისთვის აკავშირებს რა მას ევროკავშირის ბაზართან და მზად არის მომავალშიც შეასრულოს საიმედო პარტნიორის როლი.  მისი განცხადებით ენერგო მიწოდების დივერსიფიკაცია და სატრანსპორტო კავშირების განვითარება უზრუნველყოფს რეგიონის ქვეყნებისთვის ახალ ეკონომიკურ შესაძლებლობებს და მათ  მდგრად და სტაბილურ განვითარებას.  საერთაშორისო ენერგეტიკული ქარტიის კონფერენციის 28-ე შეხვედრას ქ.აშხაბადში მასპინძლობს. თურქმენეთში სამუშაო ვიზიტის ფარგლებში მიხეილ ჯანელიძემ ასევე შეხვედრები გამართა მის თურქმენ კოლეგასთან რაშიდ მერედოვთან და თურქმენეთის ხელისუფლების წარმომადგენლებთან. ​

განთავსების თარიღი: 30.11.2017
 

ისრაელის სახელმწიფოში პირველად, ისრაელში მცხოვრებ თანამემამულეების საინიციატივო ჯგუფის მიერ ოფიციალურად დარეგისტრირდა ქართული დიასპორული ორგანიზაცია სახელწოდებით - „მამული“. საქართველოს საელჩო წარმატებებს უსურვებს ახლად დაარსებულ ორგანიზაციას თავისი მიზნების განხორციელებაში. უახლოეს მომავალში  ორგანიზაციის ხელმძღვანელი პირები საზოგადოებისა და ისრაელში მცხოვრები თანამემამულეების წინაშე წარსდგებიან კონკრეტული გეგმებით. საელჩო გამოხატავს მზადყოფნას კომპეტენციის ფარგლებში ხელი შეუწყოს და ითანამშრომლოს ხსენებულ დიასპორულ ორგანიზაციასთან. 

განთავსების თარიღი: 28.11.2017
 

საქართველოს საელჩო ისრაელის სახელმწიფოში ღრმა მწუხარებას გამოხატავს მიმდინარე წლის 24 ნოემბერს, ქ. ბათუმში სასტუმრო „ლეო გრანდში“ დატრიალებული ტრაგედიის გამო და უთანაგრძნობს გარდაცვლილთა ოჯახებს. საქართველოს მთავრობის გადაწყვეტილებით 2017 წლის 27 ნოემბერი, გამოცხადდა გლოვის დღედ და ტრაგედიის დროს გარდაცვლილთა ხსოვნის პატივსაცემად, საქართველოს მთელ ტერიტორიაზე დაეშვება საქართველოს სახელმწიფო დროშები, ასევე ისრაელის სახელმწიფოში საქართველოს საელჩოსთან.

განთავსების თარიღი: 27.11.2017
 

ამა წლის 23 ნოემბერს ქ. იერუსალიმის მუსიკისა და ცეკვის აკადემიის სცენაზე კიდევ ერთხელ გაიჟღერა მსოფლიო სამუსიკო ხელოვნების დიდოსტატთა, გია ყანჩელისა და იოსებ ბარდანაშვილის შემოქმედებამ. მათი ნაწარმოებები კლარნეტისა და ფორტეპიანოსათვის, ვირტუოზულად შეასრულეს ცნობილმა მუსიკოსებმა, კლარნეტისტმა იულიან მილკინმა და პიანისტმა ვადიმ მონასტირსკიმ. კონცერტის მსმენელი გია ყანჩელისა და სოსო ბარდანაშვილის შემოქმედების მოყვარულთა და მაღალი სამუსიკო ხელოვნების უმკაცრეს პროფესიონალთა ნაკრებს წარმოადგენდა, რომელმაც სცენიდან გაჟღერებული „მეტამორფოზა“ (ს. ბარდანაშვილი) და „მუსიკა თეატრისა და კინოსათვის“ (გ. ყანჩელი) გულწრფელი „ბრავოთი“ და მხურვალე ოვაციებით დააჯილდოვა. საქართველოს საელჩო უღრმეს მადლობას უხდის ბატონ გიასა და ბატონ იოსებს მსოფლიოში ჩვენი კულტურის ასეთ სიმაღლეებზე წარმოჩენისთვის და საქართველოს სასახელოდ, ხანგრძლივ სიცოცხლეს და  შემოქმედებით წარმატებას უსურვებს. 

განთავსების თარიღი: 24.11.2017
 

შეხვედრაზე ლევან დავითაშვილმა საქართველოში აგრარული დარგის გამოწვევებსა და კონკრეტულ სამომავლო გეგმებზე ისაუბრა. მინისტრმა ხაზგასმით აღნიშნა, რომ საქართველოსთვის მნიშვნელოვანია ისრაელის გამოცდილების გაზიარება და თანამშრომლობა თანამედროვე ტექნოლოგიების გაცნობის, გაცვლითი სასწავლო პროგრამების განხორციელების და ერთობლივი სამეცნიერო კვლევების მიმართულებით.„ჩვენ გვინდა ისრაელსა და საქართველოს შორის სამეცნიერო-სასწავლო მიმართულებით თანამშრომლობა მემორანდუმის ფარგლებში განვახორციელოთ. ისრაელის სოფლის მეურნეობის კვლევით ორგანიზაციის, Volcani ცენტრის წარმომადგენლებთან შეხვედრაზე, სწორედ ამ საკითხებზე ვიმსჯელეთ. ეს იქნება ერთობლივი კვლევები და სასწავლო პროექტები ვეტერინარიის, ფიტოსანიტარიისა და სურსათის უვნებლობის მიმართულებებით. ჩვენ ასევე ვგეგმავთ თანამშრომლობას იმერეთის რეგიონში სასათბურე კლასტერის განვითარების კუთხით, სადაც თანამედროვე ტექნოლოგიების მოწოდებით ისრაელის სხვადასხვა მსხვილი კომპანია მიიღებს მონაწილეობას“, - აღნიშნა ლევან დავითაშვილმა.ვიზიტის ფარგლებში, საქართველოს დელეგაციის წევრებმა შეხვედრა ისრაელის საგარეო საქმეთა სამინისტროში, ისრაელის საერთაშორისო თანამშრომლობის განვითარების პროგრამის „მაშავი“ ხელმძღვანელის მოადგილესთან,იუვალ ფუქსთან გამართეს.

განთავსების თარიღი: 24.11.2017
 

აშხაბადში ხელი მოეწერა ავღანეთიდან თურქმენეთის და სამხრეთ კავკასიის გავლით ევროპის მიმართულებით ახალი სატრანსპორტო დერეფნის „ლაპის ლაზულის“  შეთანხმებას.  დოკუმენტს ხელი მოაწერეს პროექტში ჩართული ქვეყნების - ავღანეთის, თურქმენეთის, აზერბაიჯანის, საქართველოსა და თურქეთის წარმომადგენლებმა. საქართველოს მხრიდან „ლაპის ლაზულის“ შეთანხმებას ხელი მოაწერა საქართველოს ვიცე-პრემიერმა, საგარეო საქმეთა მინისტრმა მიხეილ ჯანელიძემ.  შეთანხმება ითვალისწინებს პროექტში ჩართულ ქვეყნებს შორის სატრანსპორტო ურთიერთობების ხელშეწყობას, რაც გულისხმობს ტვირთების და მგზავრების დაუბრკოლებელი გადაადგილების ხელშეწყობას, სატრანზიტო მოძრაობასთან დაკავშირებული ადმინისტრაციული საკითხების და პროცედურების ჰარმონიზაციას და ა.შ.  საქართველოს ვიცე-პრემიერის შეფასებით ამ პროექტში ჩართულობით საქართველო გახდა კიდევ ერთი უმნიშვნელოვანესი საერთაშორისო სატრანზიტო დერეფნის მონაწილე. „დღეს ჩვენ ძალიან მნიშვნელოვან მრავალმხრივ შეთანხმებას მოვაწერეთ ხელი. ავღანეთი, თურქმენეთი, აზერბაიჯანი, საქართველო და თურქეთი - ეს არიან  ქვეყნები, რომელთაც ახალ სატრანზიტო დერეფანს დაუდეს საფუძველი.  ეს გულისხმობს მეტი ტვირთის მოძრაობას ამ დერეფნის გავლით  და ახალ შესაძლებლობებს ჩვენი ქვეყნებისთვის,  საქართველოსთვის და რეგიონისთის. ეს არის ჩვენი პოლიტიკის  მიმართულებით გადადგმული მნიშვნელოვანი ნაბიჯი, რომ  საქართველო იყოს აქტიური მონაწილე რეგიონის სატრანზიტო პროექტების“- განაცხადა მიხეილ ჯანელიძემ.  მან ასევე დადებითად შეაფასა საქართველო-თურქმენეთის ორმხრივი თანამშრომლობა, რომელიც ბოლო პერიოდის განმალობაში დინამიურად ვითარდება  და ეფუძნება მრავალ საერთო ინტერესს, მათ შორის ქვეყნებს შორის არსებულ მეგობრობას, ასევე ეკონომიკური თანამშრომლობისა და სატრანზიტო შესაძლებლობების განვითარების მხრივ არსებულ დაინტერესებას.  აშხაბადში ვიზიტის ფარგლებში, მიხეილ ჯანელიძე შეხვდა კოლეგას, თურქმენეთის მინისტრთა კაბინეტის თავმჯდომარის მოადგილეს, საგარეო საქმეთა მინისტრს რაშიდ მერედოვს. ასევე მონაწილეობა მიიღო ავღანეთის ეკონომიკური განვითარების საკითხზე საერთაშორისო კონფერენციაში. ​

განთავსების თარიღი: 17.11.2017
 

ამა წლის 16 ნოემბერს, საქართველოს ელჩმა უმასპინძლა ისრაელის მოწინავე მასალების ინსტიტუტის უფროსი მეცნიერ-თანამშრომელს ბატონ მალხაზ ნანიკაშვილს, რომელმაც ბატონ ელჩს დაწვრილებით უამბო ამა წლის 6-7 ნოემბერს ისრაელის ბარ-ილანის უნივერსიტეტის ღვაწლმოსილ მეცნიერთა დელეგაციის საქართველოში ვიზიტის შესახებ. აღნიშნული დელეგაციის წევრები გახლდნენ ბარ-ილანის უნივერსიტეტის ნანო-ტექნოლოგიების და მოწინავე მასალების ინსტიტუტის დირექტორი, პროფ. იუვალ გარინი,  უნივერსიტეტის ქიმიის ფაკულტეტის ხელმძღვანელი, პროფ. იციკ მასტაი, უნივერსიტეტის ბირთვული ფიზიკის ლაბორატორიის ხელმძღვანელი, პროფ. ამოს შარონი და უნივერსიტეტის ბიო-ინჟინერიის  ლაბორატორიის ხელძღვანელის ორით შეფი. ისრაელ მეცნიერთა ვიზიტი საქართველოს სამეცნიერო დაწესებულებებში დაგეგმილი და ორგანიზებული გახლდათ ბატონი მ. ნანიკაშვილის მიერ. 

განთავსების თარიღი: 16.11.2017
 
კვ ორ სა ოთ ხუ პა შა
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

დიასპორის სტრატეგია

 

 

საქართველო საერთაშორისო რეიტინგებში

 

 

 
საავტორო უფლებები დაცულია © 2005-2009 | საქართველოს საგარეო საქმეთა სამინისტრო
დამზდებულია ITDC–ის მიერ