ვებ-გვერდი მუშაობს განახლების რეჟიმში
 

 



საქართველოს საგარეო საქმეთა სამინისტრო

 

ამა წლის 15 ოქტომბერს, თელ-ავივში, ისრაელური ოქროს შემოდგომის უმშვენიერეს საღამოს, საქართველოს საელჩო ისრაელელ სტუმრებთან ერთად საქართველოს დამოუკიდებლების აღდგენის 26-ე წლისთავს და საქართველოსა და ისრაელის დიპლომატიური ურთიერთობის 25 წლის იუბილეს ზეიმობდა. ღონისძიებას, რომელიც  თელ-ავივის  „ერეც ისრაელის მუზეუმ“-ის ალექსანდრეს ცენტრის ვერანდაზე გაიმართა,  ისრაელის პოლიტიკურ და საზოგადო მოღვაწეთა, ისრაელში მოღვაწე დიპლომატიური კორპუსისა და ქართველ ებრაელთა თემის ღვაწლმოსილი  წარმომადგენელების ფართო სპექტრი ესწრებოდა. საქართველოს ელჩი ბატონი პაატა კალანდაძე და მისი მეუღლე, ქალბატონი თამარ კალანდაძე საზეიმოდ იღებდნენ მოწვეულ სტუმრებს. ღონისძიება საქართველოს და ისრაელის ჰიმნის მოსმენის შემდეგ, მისასალმებელი სიტყვით საქართველოს ელჩმა გახსნა. მან დამსწრე საზოგადოებას მხურვალედ გაუზიარა ისრაელისა და საქართველოს მეოთხედი საუკუნის დიპლომატიური ურთიერთობების დამყარების სიხარული, მოკლედ მიმოიხილა ქართველი და ებრაელი ხალხის 26 საუკუნოვანი, უნიკალური თანაცხოვრების ისტორია საქართველოში და განსაკუთრებული ყურადღება ორი ქვეყნის 25 წლიან აღმავალ, წარმატებულ დიპლომატიურ, ეკონომიკურ თუ კულტურულ ურთიერთობებზე გაამახვილა. ბატონი ელჩის გამოსვლის შემდეგ, დამსწრე საზოგადოებას სიტყვით ისრაელის ეროვნული ინფრასტრუქტურის, ენერგეტიკისა და წყალმომარაგების მინისტრმა, ისრაელის უსაფრთხოების კაბინეტის წევრმა იუვალ შტეინიცმა მიმართა. მისი გამოკვეთილად მეგობრული და საქმიანი სიტყვა განმსჭვალული იყო საქართველოსადმი დიდი სიყვარულითა და მომავალი ნაყოფიერი თანამშრომლობის სურვილითა და მტკიცე იმედით. საქართველოსადმი აშკარად დადებითი ემოციები არ დაუმალავთ, ასევე, ღონისძიების საპატიო სტუმრებს, იერუსალიმის პატრიარქს, თეოფილოს მესამესა და წარმოშობით ქართველს, ისრაელის საგარეო საქმეთა მინისტრის პირველ მოადგილეს ციპი ხოტოველს. საოცრად თბილი, მეგობრობით გაჯერებული „ოფიციალური“ ღონისძიება ნამდვილ ზეიმად ანსამბლი „ალილოს“ მიერ შესრულებულმა „თბილისომ“ და მელოდიურმა ებრაულმა სიმღერამ აქცია. ქართული ხალხური სიმღერების ფონზე, დამსწრე საზოგადოება არანაკლები კმაყოფილებით აგემოვნებდა ქართულ კერძებს, ღვინოს და ქართული წარმოების სხვა ნაწარმს. საქართველოს საელჩო მოკრძალებით, მაგრამ დიდი სიამაყით აღნიშნავს 15 ოქტომბრის საერთო ზეიმის წარმატებით დასრულებას და აღიარებს, რომ ეს საღამო გახლდათ ისრაელის სახელმწიფოში საქართველოს საელჩოს მომავალი ნაყოფიერი მოღვაწეობისათვის მიღებული კიდევ ერთი ძლიერი მუხტი.

განთავსების თარიღი: 17.10.2017
 

ებრაელი ხალხის "სიმხათ თორას’’ დღესასწაულთან დაკავშირებით, ისრაელის სახელმწიფოში საქართველოს საელჩო არ იმუშავებს  ა. წ. 12 ოქტომბერს.

חג שמח לכולם!

 

განთავსების თარიღი: 11.10.2017
 

 საქართველოსა და ისრაელის დიპლომატიური ისტორიის მეოთხედი საუკუნე გუშინ, 2017 წლის 10 ოქტომბერს, ნამდვილი ტრიუმფით აღინიშნა თელ-ავივის ოპერაში  „საქართველოს საგანძურად“ აღიარებული,  ქართული ხალხური ცეკვისა და სიმღერის ღვაწლმოსილი ანსამბლის, „ერისიონის“ კონცერტით. საქართველოს საელჩოს ინიციატივით ორ ქვეყანას შორის დიპლომატიური ურთიერთობების დამყარების 25 წლისთავისადმი მიძღვნილი ტურნე „ერისიონმა“ ისრაელის კიდევ რამდენიმე დიდ ქალაქში (ბეერ-შევა, აშდოდი) ჩაატარა და ყველგან მაყურებლისა და მსმენელის აღფრთოვანებული ოვაციების თანხლებით ააფრიალა სცენაზე ქართული დროშა.  „ერისიონი“, რომელმაც უკვე დიდი ხანია მსოფლიოს არაერთი სცენა დაიპყრო, ისრაელში პირველად იმყოფებოდა. თელ ავივის ოპერის ხალხით გადაჭედილი დარბაზი, ფეხზე დამდგარი, ერთნაირი აღფრთოვანებით უსმენდა ქართულ მრავალჟამიერს, ებრაულ „შალომ ისრაელსა“ და „ჰავანა გილას“.  სცენაზე სრულად იქნა წარმოდგენილი საქართველოს დიდ კულტურა და დამსწრე საზოგადოებამ ეს რეალური ფაქტი გულწრფელი ოვაციებითა და მხურვალე აპლოდისმენტებით დაადასტურა. ისინი საოცარი ემოციებით შეეგებნენ ანსამბლის დიდ მაესტროს ჯემალ ჭკუასელს, მის ვაჟს, არაჩვეულებრივ ლოტბარ ედიშერ ჭკუასელსა და ქალიშვილს, ქორეოგრაფ ეკატერინე ჭკუასელს. საქართველოს საელჩომ, თუ დარბაზში, თუ კულისებში, კონცერტის ტრიუმფალური დასრულების შემდეგ, უღრმესი მადლობა გადაუხადა ჩვენი ქვეყნის თვალსაჩინო მოამაგეებს - „ერისიონის“ თითოეულ წევრს სამშობლოს ასე ღირსეულად წარმოჩენისთვის და იმ სიამაყისთვის, რომლითაც ისინი ავსებენ ყველას, ვინც დღეს, ისრაელის მიწაზე საქართველოს წარმოადგენს. საქართველოს ელჩმა ბატონმა პაატა კალანდაძემ ეს დიდი ემოცია და სიხარული სრულად გამოხატა  „ერისიონისადმი“ მიძღვნილ  სამადლობელ სიტყვაში.

 

განთავსების თარიღი: 11.10.2017
 

წელს, 9 ოქტომბერს, იერუსალიმის მახლობლად, ისრაელის ერთ-ერთ უძველეს ისტორიულ ქალაქ ეინ კერემში,  თანამედროვე მუსიკის ფესტივალზე „ეინ კერემ 2017“ მთავარი საკონცერტო სცენა, ღია ცის ქვეშ, პოპულარულ ქართულ ანსამბლ „ურსას“ და ჩვენს საყვარელ მომღერლებს, ელენე კალანდაძეს და ნინო ბაშარულს დაეთმო. ქართული ანსამბლის  მონაწილეობა „ეინ კერემ 2017“ ფესტივალში, რომელიც წარმოადგენდა საქართველოსა და ისრაელს შორის დიპლომატიური ურთიერთობების დამყარების 25 წლისთავისადმი მიძღვნილი ღონისძიებების ნაწილს, განხორციელდა ისრაელის სახელმწიფოში საქართველოს საპატიო კონსულის ი. ამედისა და საქართველოს საელჩოს ინიციატივით. კონცერტი მისასალმებელი სიტყვით გახსნა საქართველოს ელჩმა ბატონმა პაატა კალანდაძე. მან კიდევ ერთხელ შეახსენა დამსწრე საზოგადოებას საქართველოსა და ისრაელს შორის ისტორიულად აღიარებული კეთილი ურთიერთდამოკიდებულება, ხაზი გაუსვა თანამშრომლობისა და ურთიერთობების დღევანდელ წარმატებულ ფაქტებს და მადლობა გადაუხადა საპატიო კონსულს გაწეული შრომისათვის. ანსამბლი „ურსას“ რეპერტუარი, რომელიც ქართული ხალხური და ქალაქური ნაწარმოებების  თანამედროვე მუსიკალურ ინტერპრეტაციებზეა აგებული, დამსწრე საზოგადოებამ უდიდესი აღფრთოვანებითა და მხურვალე აპლოდისმენტებით მიიღო. „ურსას“ მუსიკოსების მიერ ქართული ხალხური საცეკვაო მუსიკის ვირტუოზულმა შესრულებამ  მსმენელები ფეხზეც წამოაყენა და აცეკვა კიდეც. საქართველოს საელჩო მთელი შემადგენლობით დაესწრო „ეინ კერემ 2017“-ს და სრულად გაიზიარა ქართველი მუსიკოსების წარმატება.

 

 

განთავსების თარიღი: 10.10.2017
 

ამა წლის 8 ოქტომბერს, ქ. აშდოდში გაიმართა, უკვე ტრადიციად ქცეული, ქართული კულტურისადმი მიძღვნილი ზეიმი. ამჯერადაც ქართველ ებრაელ შემსრულებლებთან ერთად,  ღონისძიებაში მონაწილეობდნენ ქართული ესტრადის ვარსკვლავები. რაც მთავარია, სწორედ ამ კონცერტით გახსნა საქართველო-ისრაელის დიპლომატიური ურთიერთობების დამყარების 25 წლისთავისადმი მიძღვნილი ტურნე ანსამბლმა „ერისიონმა“ და თავისი შესანიშნავი გამოსვლა მხურვალე და უწყვეტი აპლოდისმენტების თანხლებით ჩაატარა. „ერისიონი“ საკონცერტო ტურნე ისრაელის სხვადასხვა ქალაქებში 12 ოქტომბრამდე გაგრძელდება.  ზეიმის დაწყებამდე, დამსწრე საზოგადოებას მისასალმებელი სიტყვით მიმართა აშდოდის მერმა, ბატონმა იერიხ ლასრმა. მან კიდევ ერთხელ გაუსვა ხაზი იმ კულტურულ ურთიერთობებს, რომელიც დღეს საქართველოსა და ისრაელს შორის ასე წარმატებით ვითარდება. კონცერტს სრული შემადგენლობით ესწრებოდა საქართველოს საელჩო.

 

განთავსების თარიღი: 09.10.2017
 

ებრაულ დღესასწაულ "სუქოთ“-თან დაკავშირებით, საქართველოს საელჩო ისრაელში არ იმუშავებს  ა. წ. 5 ოქტომბერს. შესაბამისად, ამ დღეს  არ მოხდება მოქალაქეების მიღება.

საქართველოს საელჩო სარგებლობს შემთხვევით და ებრაელ ხალხს ულოცავს დამდეგ დღესასწაულს!

!חג סוכות שמח

განთავსების თარიღი: 03.10.2017
 

 

ა.წ. 1 ოქტომბერს, ქ. იერუსალიმში მდებარე ჯვრის მონასტერში, ბოლო 20 წლის განმავლობაში,  პირველად გაიმართა საპატრიარქო წირვა, რომელიც ჯვრის მონასტრის დღის აღსანიშნავად ჩაატარა იერუსალიმის ბერძნული მართლმადიდებლური ეკლესიის წინამძღვარმა, პატრიარქმა თეოფილოს III-მ.

ღონისძიების საპატიო სტუმრებს შორის იყვნენ საქართველოს ელჩი, ბ-ნი პაატა კალანდაძე და აღმოსავლეთ იერუსალიმში საბერძნეთის გენერალური კონსული.

 

განთავსების თარიღი: 02.10.2017
 

ამა წლის 27 სექტემბერს, საქართველოს ელჩმა ბატონმა პაატა კალანდაძემ შეხვედრა გამართა ღვაწლმოსილ მეცნიერთან, პოლიტიკურ და საზოგადო მოღვაწესთან, საქართველოს საპატიო მოქალაქესთან, ბატონ შალომ დავითთან (შალვა დავითაშვილი). ბატონ შალომს ისრაელში ამოსვლის დღიდან (გასული საუკუნის 70-იანი წლები) დიდი ღვაწლი მიუძღვის საქართველო-ისრაელის სამეცნიერო-კულტურული და პოლიტიკური ურთიერთობების ჩამოყალიბებასა და განვითარებაში. ისრაელში იგი წლების განმავლობაში მუშაობდა სახელმწიფო სამსახურების არაერთ მაღალ თანამდებობაზე - გახლდათ ქალაქ ხულონის მერის მოადგილე და აღმასრულებელი საბჭოს წევრი. მის კალამს ეკუთვნის ცნობილი ხუთწიგნეული - „ებრაელი ხალხის ისტორია“. 

შეხვედრაზე საუბარი გაიმართა ისრაელი-საქართველოს სამეცნიერო-კულტურული ურთიერთობების გაღრმავებაზე სხვადასხვა მიმართულებების სამეცნიერო კონფერენციებისა და ფორუმების მოწყობის გზით საქართველოსა და ისრაელში. მხარეებმა, ასევე, ყურადღება გაამახვილეს ქალაქ ხულონში 2006 წელს დაარსებული რუსთაველის სახელობის მემორიალური სკვერის (პარკის) აღდგენასა და იქ დადგმული მემორიალური პედესტალის განახლებაზე. გამოითქვა სურვილი, რომ ეს მნიშვნელოვანი იდეა მიმდინარე წლის ბოლომდე განხორციელდეს.

განთავსების თარიღი: 28.09.2017
 

ა. წ. 25 სექტემბერს, საქართველოს ელჩმა ბ-ნმა პაატა კალანდაძემ მონაწილეობა მიიღო სასწავლო კურსის "ახალგაზრდა დიპლომატების“ დახურვის საზეიმო ცერემონიაში, რომლის ორგანიზატორები იყვნენ  ქ. რეხოვოთის მერია და „ისრაელის ახალგაზრდა ლიდერთა ცენტრი“. 

კურსდამთავრებულებთან ერთად ღონისძიებას ესწრებოდნენ მათი მშობლები, „ისრაელში დიპლომატთა კლუბის“ პრეზიდენტი ელჩი იცხაკ ელდანი,  ქ. რეხოვოთის მუნიციპალიტეტის და კომპანია "Radco“-ს  წარმომადგენლები.

საქართველოს ელჩის სტუმრობა განსაკუთრებით სასიხარულო იყო ახალგაზრდა დიპლომატებისთვის, რადგან ისინი კურსის ფარგლებში სასწავლო ვიზიტით, სწორედ საქართველოში იმყოფებოდნენ.

 სტუდენტებმა შეკრებილ საზოგადოებას წარუდგინეს მათ მიერ საქართველოში ახალგაზრდა ისრაელელი დიპლომატების თქმით, საქართველოში გამართული შეხვედრებიდან,  ყველაზე შთამბეჭდავი  საქართველოს პატრიარქთან შეხვედრა აღმოჩნდა.

მოწვეულმა სტუმრებმა სიტყვით გამოსვლისას, მათ შორის ბ-ნმა პაატა კალანდაძემ, ხაზი გაუსვეს, რომ ისრაელისა და საქართველოს ახალგაზრდა თაობებს შორის კავშირების გაძლიერება გახლავთ სწორედ ის მიმართულება, რომელიც ორი ქვეყნის მეგობრული ურთიერთობების მომავალში გაგრძელების საწინდარია.

 

განთავსების თარიღი: 27.09.2017
 

საქართველოს საელჩო სიხარულით აცხადებს, რომ წილად გვხვდა ბედნიერება, ერთ-ერთმა პირველებმა მივულოცოთ ჩვენ სასიქადულო მუსიკოსს იოსებ (სოსო) ბარდანაშვილს კიდევ ერთი ბრწყინვალე გამარჯვება - პირველი პრიზი არფისთვის შექმნილი ნაწარმოებების მე-20 საერთაშორისო კონკურსზე, რომელიც დღეს, 26 სექტემბერს  ისრაელის „ბუხმან მეხტას სამუსიკო აკადემიაში“ გაიმართა. ამ გამარჯვებამ ბატონი სოსოს საეთაშორისო აღიარება კიდევ უფრო შორს გაიტანა. გილოცავთ, ვამაყობთ და ვხარობთ თქვენთან ერთად, ბატონო სოსო!    

განთავსების თარიღი: 26.09.2017
 
კვ ორ სა ოთ ხუ პა შა
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

დიასპორის სტრატეგია

 

 

საქართველო საერთაშორისო რეიტინგებში

 

 

 
საავტორო უფლებები დაცულია © 2005-2009 | საქართველოს საგარეო საქმეთა სამინისტრო
დამზდებულია ITDC–ის მიერ