ვებ-გვერდი მუშაობს განახლების რეჟიმში
 

 



საქართველოს საგარეო საქმეთა სამინისტრო

 

 ამა წლის 15 თებერვალს, საქართველოს ელჩმა, ბატონმა პაატა კალანდაძემ  საელჩოში უმასპინძლა ქართველ მეცნიერთა ჯგუფს, რომელმაც 12-14 თებერვალს ევროგაერთიანების პროგრამა „Erasmus+“-ის ფარგლებში მიმდინარე პროექტის - „უკეთესი კომუნიკაციის მხარდაჭერა“ (ABC) კონსორციუმის შეკრებაში მიიღო მონაწილეობა. შეკრებას ისრაელში ორგანიზებას უწევდნენ ქ.ჰაიფას უნივერსიტეტი, ასევე, გორდონისა და ონოს აკადემიური კოლეჯები. აღსანიშნავია, რომ კონსორციუმის 16 წამყვანი  უნივერსიტეტიდან სამი ქართულია: ილიას უნივერსიტეტი, საქართველოს საზოგადოებრივ საქმეთა უნივერსიტეტი (GIPA) და ბათუმის უნივერსიტეტი.

განთავსების თარიღი: 16.02.2018
 

 

15 თებერვალს, საელჩოს დესპანმა ბექა ჩხეიძემ მონაწილეობა მიიღო ისრაელის საერთაშორისო თანამშრომლობის განვითარების სააგენტოს (MASHAV)  და ისრაელის სოფლის მეურნეობის სამინისტროს მიერ ერთობლივად ორგანიზებული საერთაშორისო სასწავლო კურსის დასრულების საზეიმო ცერემონიალში. ღონისძიებაში მონაწილეობდნენ საქართველოს წარმომადგენლები ვერიკო ხომერიკი და თამარ ლაბარტყავა. კურსის მონაწილეებს მისასალმებელი სიტყვით მიმართა ბ. ჩხეიძემ, რომელმაც მადლობა გადაუხადა ისრაელურ მხარეს წლების განმავლობაში, ქართველი სპეციალისტების კვალიფიკაციის ამაღლების მიზნით, ტექნიკური დახმარების ფარგლებში შეტანილი წვლილისთვის.    

განთავსების თარიღი: 16.02.2018
 

ა.წ. 13 თებერვალს, საქართველოს ელჩი პაატა კალანდაძე და საპარტნიორო ფონდის თავმჯდომარე დავით საგანელიძე ესტუმრნენ ისრაელურ კომპანია "Elbit’’-ს, სადაც შეხვედრები გამართეს კომპანიის პრეზიდენტთან ბ. მახლისთან. ვიზიტის ფარგლებში ქართულმა დელეგაციამ მოინახულა "Elbit’’-ის საწარმო ცენტრი "ციკლონი’’, სადაც ობიექტის დათვალიერების შემდეგ გაიმართა შეხვედრა ქართველი სპეციალისტების 40 კაციან ჯგუფთან - ამჟამად ქართველი სპეციალისტები  გადიან გადამზადების ეტაპს, რათა მომავალში მუშაობა განაგრძონ "ციკლონის“ ახალ საწარმოში, რომლის მშენებლობაც მიმდინარეობს ქ. თბილისთან ახლოს. აღსანიშნავია, რომ ისრაელური მხარე დიდ კმაყოფილებას გამოთქვამს ახალგაზრდა ქართველი სპეციალისტების მომზადების დონით, რაც ერთობლივი პროექტის წარმატებით განხორციელების ერთ-ერთი მთავარი საწინდარი გახლავთ. საქართველოში "ციკლონის’’ მშენებლობა დასრულდება მიმდინარე წლის ბოლოს, წარმოება კი ამუშავდება  2019 წლის დასაწყისიდან. 

განთავსების თარიღი: 15.02.2018
 

ამა წლის 12 თებერვალს ისრაელის საგარეო საქმეთა სამინისტრომ საფუძველი ჩაუყარა საერთაშორისო ქსელს სახელწოდებით „ქალები დიპლომატიაში“. ქსელის გახსნის ცერემონიას ისრაელში არსებულ დიპლომატიურ მისიებში მოღვაწე 100-ზე მეტი ქალი დაესწრო. ცერემონიის ოფიციალური ნაწილის წინ, სამინისტროს ფოიეში გამართულ ფურშეტზე დიპლომატ ქალებს საშუალება მიეცათ არაფორმალურ გარემოში გასცნობოდნენ ერთმანეთს და კოორდინატები გაეცვალათ. დიპლომატ ქალთა ქსელის პირველი ღონისძიების თემა „ქალი და დიპლომატია“ გახლდათ, მთავრი მომხსენებელი - ისრაელის იუსტიციის სამინისტროს გენერალური დირექტორი ემი პალმორი. მან იერარქიულ კიბეზე თავის, როგორც მანდილოსნის, კარიერულ წინსვლასთან დაკავშირებულ ურთულეს პრობლემებზე ღიად ისაუბრა და ამ პრობლემების დაძლევის რამდენიმე ხერხი და „საიდუმლო“ კოლეგებს გაუზიარა. ემი პალმორის თანამომხსენებლები გახლდნენ „ქალი ელჩები მსოფლიოს სხვადასხვა კუთხიდან“ - საფრანგეთის, კანადის, განის და ისრაელის ელჩი ქალბატონები. ისინი დარბაზში მსხდომ დიპლომატ ქალებთან და მამაკაცებთან ერთად, დიპლომატიის სფეროში ქალის როლის უნიკალურ პერსპექტივებსა და მნიშვნელობას, დისკუსიის რეჟიმში განიხილავდნენ. შეკრების დასასრულს, ორგანიზატორებმა დიპლომატ ქალთა ქსელის ამუშავება ოფიციალურად გამოაცხადეს და შემდეგი შეკრება ამა წლის 10 აპრილისთვის დანიშნეს. მეორე შეკრების ორგანიზატორი და მასპინძელი ისრაელის სახელმწიფოში საფრანგეთის ელჩი, ქალბატონი ჰელენ ლე გალი (Hélène Le Gal) იქნება. საქართველოს საელჩომ დიპლომატ ქალთა საერთაშორისო ქსელის ქართველ წარმომადგენლად საელჩოს მრჩეველი ქალბატონი მანანა დუმბაძე წარადგინა.

განთავსების თარიღი: 14.02.2018
 

 ა.წ. 12 თებერვალს, საელჩოს დესპანი ბექა ჩხეიძე შეხვდა ისრაელის ერთ-ერთი წამყვანი უნივერსიტეტის ხაიფას „Technion International“ მარკეტინგის დირექტორს ქალბატონ ჰადას შაფირს. შეხვედრა გაიმართა, ისრაელის სახელმწიფოში საქართველოს პრემიერ-მინისტრის ბატონ გიორგი კვირიკაშვილის ვიზიტის ფარგლებში, ისრაელურ მხარესთან მიღწეული შეთანხმებების იმპლემენტაციის ფარგლებში. შეხვედრაზე მხარეებმა განიხილეს ხაიფას “ტექნიონში” ქართველი სტუდენტების სწავლების, საქართველოს უნივერსიტეტებთან თანამშრომლობისა და გაცვლითი პროგრამების, აგრეთვე ხაიფას უნივერსიტეტის სხვა სახის სასწავლო პროგრამებში საქართველოს წარმომადგენლობის ჩართვის შესაძლებლობა. უნივერსიტეტის წარმომადგენელმა დაინტერესება გამოხატა ქართულ მხარესთან თანამშრომლობის თვალსაზრისით და ამ მიზნით, შესაბამისი დეტალური ინფორმაციის მოწოდება აღუთქვა საელჩოს წარმომადგენელს.

განთავსების თარიღი: 14.02.2018
 

8.02.2018 ქ.თბილისი - „ზუსტად 100 წლის წინ დაიწყო უმნიშვნელოვანესი ახალი ეტაპი ჩვენი ქვეყნის მრავალსაუკუნოვანი სახელმწიფოებრიობის ისტორიაში. ამ მოვლენას, საქართველოს გონების სუვერენობის აღდგენაც კი უწოდეს“- ამ სიტყვებით მიმართა საქართველოს ვიცე-პრემიერმა, საგარეო საქმეთა მინისტრმა ივანე ჯავახიშვილის სახელობის თბილისის სახელმწიფო უნივერსიტეტის 100 წლის იუბილისადმი მიძღვნილი სიმპოზიუმის მონაწილეებს.მან სახელმწიფო უნივერსიტეტს, პროფესორ-მასწავლებლებს და სტუდენტებს მიულოცა საიუბილეო თარიღი და ხაზი გაუსვა ამ თარიღის მნიშვნელობას საქართველოს დემოკრატიული განვითარების პროცესში.საქართველოს პირველმა საგარეო საქმეთა მინისტრმა, ალექსანდრე ჩხენკელმა, გახსნით სიტყვაში ბრძანა, „რომ უნივერსიტეტის გახსნა მიეწერება დიდ მოძრაობას, რომელშიც აქტიურ მონაწილეობას იღებდა ქართველი ერი, მისი დემოკრატია... დემოკრატიის ღვაწლმა მოგვივლინა დღევანდელი დღესასწაული.“მიხეილ ჯანელიძის შეფასებით უნივერსიტეტი დაფუძნების დღიდან იქცა  ისტორიული ტრადიციების მატარებელ, პროგრესისა და დემოკრატიის განვითარების უმთავრეს ცენტრად და მან უდიდესი წვლილი შეიტანა ახალი, დემოკრატიული იდეებით აღჭურვილი თაობის პატრიოტული სულისკვეთების ჩამოყალიბებაში.„შარშან, საგარეო საქმეთა სამინისტრომ, დიპლომატიის დღე აღნიშნა ივანე ჯავახიშვილის უნივერსიტეტში. ეს იყო მართლაც გამორჩეული ფორმატი, რომელმაც ახალგაზრდა თაობას და გამოცდილ დიპლომატებს საქართველოს და მსოფლიოს გამოწვევებზე თავისუფალ ფორმატში აზრის გაცვლის შესაძლებლობა მისცა."- აღნიშნა მინისტრმა.მისივე განცხადებით, პირველი ეროვნული უნივერსიტეტის გახსნა იყო უდიდესი  ისტორიული მოვლენა არამარტო საქართველოსთვის არამედ მთელი სამხრეთ კავკასიის რეგიონისთვის. „უნივერსიტეტის კარი ღია იყო და არის ყველასთვის და იგი არის კულტურათა დაახლოების და ტოლერანტული განწყობების ჩამოყალიბების ცენტრი“-აღნიშნა მინისტრმა.ვიცე-პრემიერმა საკუთარ გამოსვლაში ხაზი გაუსვა უნივერსიტეტის განსაკუთრებულ როლს, როგორც საქართველოს განვითარებისა და ევროპული მისწრაფებების რეალიზაციის, ისე  საერთაშორისო საზოგადოების წინაშე არსებული გამოწვევების დაძლევისთვის. „ჩვენ ვეძებთ გზებს, თუ როგორ გავუმკლავდეთ მსოფლიოს მასშტაბით, და განსაკუთრებით ჩვენს რეგიონში, წინა საუკუნეების პოლიტიკის გამოძახილს, რომელიც  ეფუძნება სამხედრო აგრესიით, თანამდროვე საერთაშორისო წესრიგის  ძირეული პრინციპების ხელყოფას.გლობალიზაცია, ახალ შესაძლებლობებს და საფრთხეებს ქმნის. ჩვენ ვეძებთ გზებს თუ როგორ მოვერგოთ მეოთხე ინდუსტრიულ რევოლუციას. როგორ შევცვალოთ განათლების სისტემა ისე, რომ შევძლოთ სწრაფად განვითარებადი ხელოვნური ინტელექტის, ვირტუალური რეალობის და ციფრული სამყაროს ადამიანის სამსახურში ჩაყენება. ამისათვის, აუცილებელია განათლების სფეროს ფუნდამენტური გადააზრება. ჩვენ უნდა ვასწავლოთ მომავალ თაობებს ის, რასაც ვერ ისწავლის ხელოვნური ინტელექტი! ეს, პირველ რიგში, არის თავისუფალი აზროვნება და ადამიანური ფასეულობები, ის რაც მარადიულია და კაცობრიობის განვითარების საფუძველს წარმოადგენს. დარწმუნებული ვარ, რომ თბილისის სახელმწიფო უნივერსიტეტი ტრადიციულად იქნება პროცესების ავანგარდში, “- განაცხადა ჯანელიძემ საკუთარ გამოსვლაში მიხეილ ჯანელიძემ განსაკუთრებით გაუსვა ხაზი საიუბილეო სიმპოზიუმში საქართველოს კათოლიკოს-პატრიარქის მონაწილეობას. „უწმინდესმა  და უნეტარესმა ამ წლების განმავლობაში ფასდაუდებელი შრომა გასწია ქვეყანაში, რათა სულიერი ფასეულობები  აემაღლებინა ჩვენს საზოგადოებაში და ხელი შეეწყო ჩვენი ერის განსწავლულობისათვის.  1918 წელს, გახსნით ღონისძიებაზე, სრულიად საქართველოს კათოლიკოს-პატრიარქმა კირიონ მეორემ როგორც ბრძანა - „სარწმუნოება არასდროს მტრულად არ უცქეროდა მეცნიერებას და ამიტომ იგი მუდამ ეკედლებოდა სარწმუნოებებს.“- განაცხადა მინისტრმა.მისივე განცხადებით სიმბოლურია, რომ უნივერსიტეტის დამფუძნებლებმა  დავით აღმაშენებლის ხსენების დღე შეარჩიეს უნივერსიტეტის დაარსების დღეს,  რითიც „ნათელი გახადეს, თუ რა შორსმჭვრეტელ და დიად მიზანს ემსახურებოდა მათი წამოწყება.მინისტრი მიესალმა უინესკოს მიერ   თბილისის სახელმწიფო უნივერსიტეტის იუბილეს  შეიტანას მსოფლიოს 2018 ღირსშესანიშნავ თარიღთა სიაში.

განთავსების თარიღი: 12.02.2018
 

 ა.წ. 12 თებერვალს, საქართველოს ელჩმა, ბატონმა პაატა კალანდაძემ ისრაელის „ქნესეთში“  გაცნობითი შეხვედრა გამართა ქვეყნის უმაღლეს საკანონმდებლო ორგანოში მმართველი კოალიციის ახლადდანიშნულ ლიდერთან, ბატონ დავიდ ამსალემთან. შეხვედრას ესწრებოდა „ქნესეთის“ ვიცე-სპიკერი, საქართველოსთან მეგობრობის ჯგუფის თანათავმჯდომარე, ბატონი ხილიკ ბარი. მხარეებმა განიხილეს ორ ქვეყანას შორის არსებული ურთიერთობების პოზიტიური დინამიკა და ამ კუთხით, განსაკუთრებულად აღინიშნა ისრაელის და საქართველოს საკანონმდებლო ორგანოებს შორის უკვე ჩამოყალიბებული მჭიდრო თანამშრომლობა. 

განთავსების თარიღი: 12.02.2018
 

ა.წ. 9 თებერვალს, საელჩოში გაიმართა შეხვედრა ისრაელის სახელმწიფოში ახლად დაფუძნებული ორგანიზაცია „ისრაელში ქართული ხელოვნების ცენტრის“ წარმომადგენლებთან - მარინა გელაშვილი, ციალა იოსებაშვილი, ირინა დევდარიანი, ზურაბ ბერიაშვილი და ზურაბ პოპიაშვილი.

შეხვედრაზე განხილულ იქნა ცენტრსა და საელჩოს შორის თანამშრომლობის საკითხები, ისრაელში ქართული კულტურის პოპულარიზაციის, ამასთან ისრაელში მსგავს პროფილურ ორგანიზაციებთან საერთო ძალისხმევით ერთობლივი პროექტების განხორციელების შესაძლებლობები.

შეხვედრაზე ისრაელში საქართველოს ელჩმა, ბატონმა პაატა კალანდაძემ აღნიშნა, რომ მსგავსი მიზნების მქონე ორგანიზაციის დაფუძნებასა და ფუნქციონირებას ისრაელის სახელმწიფოში უაღრესად დიდი მნიშვნელობა აქვს და საერთო ძალისხმევით ორი ქვეყნისა და ხალხისათვის მრავალი სასარგებლო პროექტის განხორციელება იქნება შესაძლებელი.

განთავსების თარიღი: 09.02.2018
 

საქართველოს საელჩო დღეს მთელ საქართველოსთან ერთად ჩვენი თბილისის სახელმწიფო უნივერსიტეტის 100 წლისთავს ზეიმობს. რა მნიშვნელობა აქვს, გვისწავლია თუ არა მის ნათელ კედლებში, იგი თავისი დიდებული წარსულით, ლეგენდარული, განმანათლებელი დამაარსებლებით, სიმაღლით, სითეთრითა და ღირსებით ყოველი ქართველის გულსა თუ გონებაში ცოდნის კერად, ქართული მეცნიერების აკვნად და სალოცავ ტაძრად აღიქმება. მთელ საქართველოს ვულოცავთ ჩვენი ასწლიანი დედა უნივერსიტეტის იუბილეს. წლებთან ერთად არასდროს ეთქვას უარი ახალგაზრდობასა და ნოვაციებზე, არ მოჰკლებოდეს მის კედლებს ქართველ ქალ-ვაჟთა თაობების მარადიული დინება.

 

განთავსების თარიღი: 08.02.2018
 

ამა წლის 8 თებერვალს, საქართველოს ელჩმა შეხვედრა გამართა ისრაელის ერთ-ერთი პოპულარული გამომცემლობა „ბახურბუქსის“ დამაარსებელთან, ბატონ იტაი ბახურთან. აღსანიშნავია, რომ ბატონი ი. ბახური უკვე რამდენჯერმეა ნამყოფი საქართველოში, შეყვარებულია საქართველოს წარმტაც ბუნებაზე და სერიოზულად სწავლობს ჩვენს კულტურას. ბატონი ი. ბახური საქართველოზე დაწერილი ორი მშვენიერი წიგნის ავტორიც გახლავთ, რომელთაგან ერთი, დაწერილი ისრაელელ ფოტოხელოვან ხედვა როკახთან ერთად, სათაურით - „ხედვა ისრაელიდან“, 2015 წელს ქართულ ენაზე ითარგმნა და საქართველოში გამოიცა. ზემოთ ხსენებული შეხვედრაც ქართულ-ებრაული ლიტერატურული ურთიერთობების განვითარების საკითხებს შეეხო. კერძოდ, მხარეებმა მიზნად დაისახეს ივრითზე ნათარგმნი ქართული ლიტერატურული კლასიკისა და საუკეთესო თანამედროვე ნაწარმოებების ანთოლოგიის შექმნა და ისრაელში გამოცემა. საქართველოს საელჩოსათვის დიდი პატივია ასეთ პროექტში მონაწილეობა. საშურ საქმეს საფუძველი ჩაეყარა. იმედი გვაქვს მალე იდეას ხორცი შეესხმება და წარმატებით დაგვირგვინდება.

განთავსების თარიღი: 08.02.2018
 
კვ ორ სა ოთ ხუ პა შა
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28      

დიასპორის სტრატეგია

 

 

საქართველო საერთაშორისო რეიტინგებში

 

 

 
საავტორო უფლებები დაცულია © 2005-2009 | საქართველოს საგარეო საქმეთა სამინისტრო
დამზდებულია ITDC–ის მიერ